Thursday, April 24, 2008

sau gram sukoon

Meri dukaan hai bahut choti si
Par bheed hamesha hoti hai
Shor bhi kabhi thamta nahi
“Ek chutki chain de do”
mand mand muskara raha hai
shayad aaj ek chutki se kaam chal jaayega
“sau gram sukoon” hichkicha kar maanga sagar ne
sava kilo thamaya maine
sukoon thoda zyaada hi ho to behtar
“ek piece peace” maanga uss anjaan naye chehre ne
sheeshe ke darwaaze se maine dekha usse
bahar nikalte hi kha gaya
ulte paanv lauta
“pav kilo peace please”
bambai ka lagta hai
“aadha kilo aaram” chaha auntyji ne
dhai so gram dhiraj bhi de diya maine
bahut raat ho chuki thi
apni iss bina poster ki dukaan bandh hi kar rahi thi
sabse purana grahak aa pahuncha
pata nahi kya kaha uski thaki ankhon ne
khushi ki khichdi, vahi kaam aayegi
usse pakadayi aur vo phir bhi khada raha
jaise usse pata tha main kuch kehna chahti hoon
iss mein thoda namak ishq ka daal lena.
ab dukaan bandh hai
kal yeh kahani phir chhedenge
hum bhi zara ab so le hain….

1 comment:

Pratz said...

I Love dissssssssss abzzzzolutely!